Në Kuçovë do të ngrihet Muzeu i Naftës dhe Aviacionit, hapet tenderi për projektimin
Qyteti i naftës dhe aviacionit pritet të transformohet përmes një projekti kulturor dhe urban që synon rikthimin e historisë në qendër të jetës publike.
Kuçova po hyn në një fazë të re zhvillimi urban dhe kulturor, me fokus rivlerësimin e trashëgimisë së saj historike. Bashkia Kuçovë ka hapur procedurën e prokurimit për studim–projektimin e ndërtimit të Muzeut të Naftës dhe Aviacionit, si dhe për rikualifikimin e bulevardit kryesor dhe sheshit përpara Bashkisë, një ndërhyrje që synon të forcojë identitetin qytetar dhe të krijojë hapësira të reja publike.
Muze modern për historinë e naftës dhe aviacionit
Sipas dokumenteve të projektimit, Muzeu i Naftës dhe Aviacionit do të konceptohet si një strukturë moderne, që ndërthur tre shtylla kryesore të identitetit të Kuçovës: aviacionin, si bazë historike ajrore e vendit; industrinë e naftës, si themel i zhvillimit ekonomik të zonës; dhe jetën urbane e sociale, nga periudha e Mbretërisë deri në ditët e sotme.
Objekti parashikohet të shtrihet në një truall rreth 9 mijë metra katrorë dhe do të përfshijë salla ekspozitash, hapësira edukative, arkivë digjitale, ambiente sociale dhe një shesh të jashtëm për aktivitete kulturore. Muzeu synon të funksionojë jo vetëm si godinë ekspozimi, por si një pikë referimi për edukimin, turizmin dhe ruajtjen e kujtesës historike.
Rikualifikimi i bulevardit dhe sheshit qendror
Paralelisht me ndërtimin e muzeut, projekti përfshin edhe rikualifikimin e bulevardit qendror të Kuçovës, me gjatësi rreth 250 metra, si dhe transformimin e sheshit përpara Bashkisë në një hapësirë komunitare funksionale. Ndërhyrjet synojnë përmirësimin e trotuareve dhe gjelbërimit, rritjen e sigurisë për këmbësorët dhe krijimin e një mjedisi më të aksesueshëm për qytetarët.
Gjithashtu, parashikohet kthimi i pjesshëm i bulevardit në zonë pedonale dhe krijimi i një sheshi të përshtatshëm për organizimin e eventeve kulturore, panaireve dhe aktiviteteve publike.
Investim për identitetin dhe turizmin lokal
Projekti konsiderohet një nga ndërhyrjet më të rëndësishme urbane dhe kulturore për Kuçovën, me synimin për të ringjallur jetën publike, për të forcuar identitetin historik të qytetit dhe për ta kthyer qendrën urbane në një hapësirë më të gjallë, funksionale dhe tërheqëse për banorët dhe vizitorët.
